25 Jun, 2019

Eusko Jaurlaritzako Enpleguko eta Gizarte Politiketako Saileko Familia Politika eta Komunitate Garapeneko Zuzendaritzak gugan jarri du konfiantza EAEn haurren eta nerabeen egoeraren jarraipena egiten laguntzeko eta ikuspegiaren informazio adierazgarriena eta eguneratua bereizteko gai den adierazle-sistema bat diseinatzeko.

Nola sortu da? Zergatik da benetan erabilgarria?

Sistema 2010ean sortu zen aurretik EDE Fundazioan egin genuen ikerketa batean garatutako tresna eta ezagutzetan oinarrituta. Ordukoa eremuan espezializatutako bi erakunderen, Pere Tarrés Fundazioaren eta Koine-Aequalitas Fundazioaren, lankidetzarekin egin genuen, Euskadiko Haur eta Nerabeentzako Defentsa Bulegorako: EAE haur eta nerabeen egoerari buruzko azterlana, haien eskubideen eta bizi-kalitatearen ikuspegitik.

Gainera, gerora berrikusi eta eguneratu egin da 2012an, 2014an eta 2016an, hobetzeko eta ahalik eta tresna erabilgarriena lortzeko, haurren ongizateari jarraipena emateko nazioarteko erakunde ugarik egindako gomendioen arabera eta ikerketa arloan izandako aurrerapenen arabera.

Funtsean tresna erabilgarriagoa izatea lortu dugu; izan ere, hasiera batean sistema osatzen duten 200 adierazle inguru izatetik eta gaur egun 100 adierazle inguruz osatutako sistema berria izatera pasatu da, adierazle “onenak” bereizteko analisi eta ebaluazio zorrotza egin ondoren.

 

Zertarako balio du?

  1. Tresna erabilgarria da haurren ongizatea neurtzeko dimentsio ugariko ikuspegitik (osasuna, hezkuntza, aisialdi, teknologia berriak… kontuan hartuta), haien ikuspegien eta bizi-kalitatearen ikuspegitik.
  2. EAEn haurren egoerari buruz eskuragarri dauden azken datu garrantzitsuenak arin biltzea eta zabaltzea ahalbidetzen du.
  3. Eskubideetan izandako aurrerapenak eta erronkak ikusgai egiteko tresna da; egoera ahulenean dauden eta urrakorrenak diren taldeak identifikatzeko eta bistaratzeko, baita arreta gehien behar duten alderdi kritikoenak ere.
  4. Erabakiak informatuta hartzea sustatzen eta babesten du, eta ebidentzietan oinarritutako politika publikoak egitea ahalbidetzen du.

 

Interesa duten eragileek lan honen emaitzak errazago jaso ditzaten, formatu ugaritan dago:

  1. Deskribapen-txostena, adierazle bakoitzaren fitxekin: fitxa bakoitzak informazio teknikoa (data, iturria, garrantzia, oharrak…) eta datuaren deskribapen laburra eta interes handieneko konparatiboak eskaintzen ditu.
  2. Txosten diagnostiko exekutiboa: egungo panoramaren ikuspegi orokorra ematea du helburu, adierazgarrienak diren adierazleen datuak jasoz eta hausnarketa eginaraziz.