17 Feb, 2019
Oñatiko Udaleko gizarte-zerbitzuen taldea sendotzen joan da duela bi hamarkada baino gehiago sortu zenetik.
Azken urteotan, Ede Fundaziotik bide horretan lagundu dugu: besteak beste, talde gisa hausnarketa estrategikoa egiten eta markatutako erronkekin bat datorren antolaketa mailako egitura sortzen.
Erronka horien atzean, eraldaketa sozialerako bokazio handia zegoela erakutsi digute, udal-zerbitzuak eskaintzeaz harago.
Jarrera horrekin, zerbitzu eta babes horien erabiltzaileei segurtasuna, konfiantza eta errespetua transmitituko dieten lan-eremu eta instalazio antolatuak izateko beharrari buruz hausnartu zuten.
Lan-ildo horren barruan, fitxategiaren (fisikoa eta digitala) antolaketa zegoen. Lana 2016 amaieraren eta 2017ko lehen seihilekoaren artean egin dugu.
Besteak beste, ekintza hauek garatu dira:
- Oinarrizko sentsibilizazio-saioa, 3S tresna digitala ezagutarazteko eta lehen unean tresna praktikatzeko eremu pilotua definitzeko.
- Taldearekin edo taldeko kide batzuekin egindako saioak, arloan sortutako dokumentuak antolatzeko, artxibatzeko eta ezabatzeko irizpideak lantzeko. Lan hori udal-jarraibideak eta betebeharrak txertatuz egiten da eta taldeak metatutako esperientziarekin taldeko irizpidea sortuz. (Karpeta digitalen zuhaitza/artxibo fisiko eta digitalaren irizpideak udal-artxibategiarekin adostuta)
- Taldearekin edo taldeko kide batzuekin egindako saioak, zerbitzu guztietan izan beharreko fitxak adosteko, herritarren eskubideak babesteko beharrezko datuen babes-klausula guztiak barne. (zerbitzuen fitxak)
Errutinazko zeregin baten aurrean motibatu den taldea topatu dugu, eta espazioaren antolaketak (birtuala eta fisikoa) pertsonei arreta emateko, entzuteko eta laguntzeko zerbitzuaren kalitatean eragina duela baloratzen jakin du. 5 kideko taldeak (orain gutxi beste bat gehitu da) esperientzia metatzen du eta, aldi berean, freskotasuna eta aurrera egiteko borondate handia du. Horren eraginez, proiektua ikaskuntza-iturria da eta esperientzia pilotu positiboa dela esan dezakegu.